CENTRAL VISAYAS-Nasakmit sa mga awtoridad ang gituohang shabu nga nagkantidad og P6,194,800 atol sa tulo ka adlaw nga Simultaneous Anti-Criminality Law Enforcement Operation (SACLEO) sa Central Visayas.
Gitino ni Police Lieutenant Colonel Gerard Ace Pelare, ang tigpamaba ni PRO-7 director Police Brigadier General Anthony Aberin, nga adunay kinatibuk-ang 168 ka anti-illegal drugs operations ang gipahigayon gikan Agosto 12 hangtod Agosto 14, 2023, sa tibuok rehiyon.
Ning panahona, nasakmit sa mga polis ang gituhoang shabu nga motimbang og 911 gramos nga adunay Standard Drug Price (SDP) nga P6,194,800.
Nakuha usab nila ang 13 gramos sa gituohang marijuana nga nagkantidad og P1,560 ug nasikop ang 196 ka mga drug personalities sulod sa tulo ka adlaw nga SACLEO.
Sa laing bahin, isip kabahin sa ilang kampanya batok sa ilegal nga sugal, ang kapulisan nihimo og 172 ka anti-illegal gambling operations ug nakadakop og 308 ka mga indibidwal sa samang panahon.
Dugang niya nga gikan sa ilang mga operasyon sa ilegal nga sugal, cash nga mokabat sa P29,318 ang nasakmit sa kapolisan.
Samtang sa kampanya batok sa loose firearms sa Central Visayas, nakahimo og kinatibuk-ang 84 ka mga operasyon sa samang panahon ug nasikop ang 10 ka mga tawo.
Nakuha usab nila ang 143 ka mga ilegal nga armas ingon man usa ka eksplosibo.
Dugang niini, ang tulo ka adlaw nga SACLEO miresulta usab sa pagkasikop sa 24 ka Most Wanted Persons (MWP) ug 167 ka Other Wanted Persons (OWP).
