PROVINCE OF CEBU- Mukabat sa kapin P742,280,000 ang i-download sa National Housing Authority (NHA) ngadto sa kagamhanan sa lalawigan sa Sugbo ug kini ubos sa ilahang Emergency Housing Assistance Program.
Kini ang gipahibalo ni NHA-7 Director Rizalino Cabahug atol na sa ilahang pakigtagbo kang Cebu Provincial Gwendolyn Garcia sa buhatan niini sa Kapitolyo.
Gi-presentar ni Cabahug ang listahan sa mga beneficiaries ngadto kang Garcia, apan matud pa sa gobernadora nga aduna na’y identified beneficiaries ang probinsiya sa Sugbo nga posibling basihan sa mahatagan ug ayuda.
Kapin sa 428,994 ang ‘totally and partially damaged’ nga mga panimalay sa tibuok probinsiya sa Sugbo ang posibling mahatagan ug ayuda, apan wala pa masuta kung pila ang madawat sa matag beneficiary.
Una niini, aduna na’y P30-milyones ang inisyal nga gipang-apod-apod niadtong Disyembre 2021 ngadto sa kapin 5,000 ka mga beneficiaries.
Giklaro ni Governor Garcia nga dili cash ang madawat sa mga beneficiaries, inay ipaagi sa gihapon kini sa Dasig Sugbo cards.
Sa pagkakarun kay gilauman nga ma-apod-apod ang maong ayuda karung hinapos sa Hulyo tungod kay gipaabot na lang nga mapirmahan ang memorandum of agreement tali sa NHA isip provider sa pondo ug ang Kapitolyo isip project implementor sa maong assistance.
