CEBU CITY – Nasikup ang usa ka kanhi welder sa gipahigayun nga buybust operation sa Sitio Lahing-Lahing, Barangay Mabolo, dakbayan sa Sugbo.
Giila ang dinakpan nga si Roland Cosep alias Landoy, 44 anyus, ug nagpuyu sa nahisgutang lugar.
Gipadayag ni Police Lieutenant Colonel Glenn Mayam, ang hepe sa Police Drug Enforcement Group (PDEG) Visayas, nga usa ka high value target si Cosep ug lakip sa target list sa lungsod sa Consolacion, ingun man sa mga kasikbit nga lugar.
Nakuha gikan sa subject ang 48 ka mga dagku nga pakete sa shabu nga adunay gibug-atun nga 1.2 kilograms ug mikabat sa P8,160,000 ang kantidad.
Gisuta karun sa mga otoridad kung si kinsa ang supplier sa dinakpan ug kung aduna ba kini amo.
Samtang, gihimakak usab sa subject nga iyaha ang mga nakuha nga shabu ug giingung gibiya-an lang kini sa wala niini mailhi nga tawu.
