Usa ka eksperto nisugyot sa gobyerno nga ipadayon ang pag-monitor sa ilang teritoryo sa West Philippine Sea (WPS) aron malikayan ang pagkadaut sa kinaiyahan ug pasakaan og kaso ang mga nagpaluyo sa pagkaguba.
Kini maoy gipahibalo ni Dr. Jonathan Anticamara sa University of the Philippines Institute of Biology.
Mipahayag si Dr. Anticamara nga bililhon kaayo ang pagmonitor, pagbantay ug pag-obserbar sa atong teritoryo aron masayran ang kamatuoran luyo sa pagkaguba sa pipila ka reef.
Matod niya, nagkinahanglan ang Pilipinas og daghang ebidensya.
Si Anticamara sa sayo pa miingon nga ang usa ka panukiduki ug surbey nga gihimo sa usa ka grupo sa mga marine scientist nakakaplag sa halapad nga coral bleaching sa Escoda (Sabina) Shoal.
Gihimo niya ang mga pahayag sa dihang gipangutana bahin sa bar o sumbanan sa pagpahigayon sa mga survey ug panukiduki, nga kinahanglan base sa kamatuoran, base sa siyensya ug makatarunganon.
Gidugang niini nga ang pagmonitor makahatag ug kahayag sa mga pangutana sa epekto sa kinaiyahan ug mga paningkamot sa pagbawi.
Sumala ni Anticamara, ang hinungdan sa pagkaguba ug sobrang pagpahimulos sa WPS mao ang presensya sa libu-libo nga mga barko sa pangisda sa China nga nagsugod sa pagpakita kaniadtong 2013.
Dugang pa ni Anticamara nga wala magtagad ang mga Insek sa pagkasensitibo sa kinaiyahan tungod kay makadaot kaayo ang ilang praktis./
