Gipadayon sa kasamtangang administrasyon ni Presidente Ferdinand Marcos Jr. ang gisugdan ni anhing Presidente Benigno Simeon ‘Noynoy’ Aquino III sa aktibong legal nga pag-angkon sa Pilipinas sa mga isla sa West Philippine Sea.
Gitumbok ni Cagayan de Oro 2nd District Congressman Rufus Rodriguez ang giingong dakong kalainan sa foreign policy ni Marcos ug kanhi Presidente Rodrigo Duterte sa territorial dispute sa Pilipinas ug China.
Sugilanon ni Rodriguez nga lakip siya sa gipatawag ni Aquino sa Malacañang kalabot sa maong butang kay nagsilbi man siya nga international lawyer maong nakahukom ang Pilipinas nga moapil sa China sa arbitraryong tribunal.
Hinuon, wala kini gipasiugda ug gigamit sa administrasyong Duterte, apan lahi nga foreign policy approach ang gisunod sa Pilipinas ngadto sa China.
Mao kini ang rason nganong dayag ang paningkamot sa administrasyong Marcos nga ipadayon ang nasugdan sa pamunoang Aquino ug ang pagpakita sa tibuok kalibotan sa kaagresibo ug pagdaogdaog sa China sa tanang kalihokan sa Pilipinas sa palibot sa WPS.
Mao usab kini ang panglantaw ni Rodriguez nga gituohan nga nag-amping ang China nga dili magsugod og gubat kay seguradong maglisod kini og pagdawat sa tibuok kalibutan batok sa ilang ilegal nga pagpanghilabot sa Pilipinas.
