CEBU CITY — Magpadayon ang pag-ban sa mga baboy gikan sa Luzon sulod sa 100 ka mga adlaw aron malikayan ang pagsulod sa African Swine Fever sa Sugbo.
Kini human nga nagkasinabot silang Agriculture Sec. William Dar ug Cebu Governor Gwendolyn Garcia, ingon man ang uban pang mga stakeholders atol sa ilang meeting.
Gipasabot ni Garcia ang giisyu niya nga Executive Order No. 16 ngadto ni Dar ug nakita niini nga temporaryo lang ang pagpatuman sa mga lakang aron dili makasulod ang ASF virus sa Sugbo.
Matud ni Dar nga pareho ang pareho nilang gitinguha ni Garcia ang pagprotehir sa hog industry sa probinsya, ingon man sa nasud.
Dugang pa niini nga padayon ang partnership sa Department of Agriculture (DA) ngadto sa local government units pinaagi sa pagbinayloay og impormasyon.
Nagtinguha si Dar nga magtinabangay ang tanan aron maprotehir ug masustenir ang hog industry sa nasud.
“In the end, we have the same objective and that is to protect the hog industry in this country. We are best of friends,” sigon pa ni Dar.
Samtang nanghinaut si Garcia nga mo-improve pa ang sitwasyon sa probinsya subay na sa mga lakang batok sa ASF sulod sa 100 ka adlaw o sayo pa.
“It is only for 100 days and we really hope that the situation will really improve after a hundred days or even before that,” dason pa sa gobernadora.
Kahinumduman nga mimando si Garcia og complete ban sa mga binuhing baboy gikan sa Luzon subay sa pagkuyanap sa African Swine Fever sa pipila ka mga lugar sa Luzon.
Mitambong usab sa maong meeting si Negros Oriental Gov. Roel Digamo apan wala si Bohol Gov. Arthur Yap gumikan kay aduna kini importante nga lakaw.
‘MAGTINABANGAY TA’
Mihangyo si DA-7 Director Salvador Deputado sa publiko nga magtinabangay ang tanan aron dili makasulod ang African Swine Fever sa rehiyon.
Matud ni Deputado nga palig-onon pa ang ilang mga countermeasures sa rehiyon aron dili makasulod ang ASF sa Central Visayas sanglit dali man ang pagkatap niini.
Gusto usab niini nga mobisita si Agriculture Sec. William Dar aron personal niyang sutaon ang kahimtang sa mga babuyan sa rehiyon.
Samtang misaad si Rolando Tambago, ang presidente sa Central Visayas Pork Producers Cooperative (CeViPPco), nga padayon silang mohatag og mga updates ngadto sa DA.
Matud ni Tambago nga nabalaka siya ug sa uban pang mga nanag-iya og baboy sa pagkuyanap sa ASF gumikan kay apektado ang ilang panginabuhian.
“Nalipay ta ana nga magpadayon ang ban while ang DA nagpadayon sa pagcontain sa disease ngadto sa Luzon,” dugang pa ni Tambago.
