CEBU CITY – Gibutyag ni Land Transportation Franchising and Regulatory Board (LTFRB-7) Regional Director Eduardo Montealto nga gitugutan na nila ang pagpabiyahe sa mga public utility vehicle human napaubos na sa GCQ ang Cebu City apan ang traditional jeepney ang wala pa gitugtan.
Gipasabot sa direktor sa dihang nahinabi sa Bombo Radyo Cebu atol sa tulumanong Zona Libre nga ang PUV nga mga bus type mao karon ang nagdagan sa Sugbo sanglit kini ang subay na usab sa ilang pagpatuman sa jeepney modernization nga ang mga jeep kagang-kagang na dili na gyud kini tugutan nga makabiyahe pa.
Subling gihimug-atan sa direktor nga wala nila sakyi o gigamit nga kahigayon ang pandemya aron nga maka-implementar sa jeepney modernization inay, ‘coincidence’ lamang gyud kining tanan.
Nasayran nga Hunyo 30 unta ang implementasyon niini apan gumikan sa kahimtang sa dakbayan gilugwayan pa sa LTFRB ang mga operators ug drivers nga maghimo og kooperatiba aron nga makadawat sa subsidy alang usab sa pagpurchase og modern buses.
Lugwayan kini sila hangtud Disyembre 30 niining tuiga aron nga makaconsolidate.
