PROVINCE OF BOHOL-Nagpabiling malinawon ug hapsay ang kahimtang sa lalawigan sa Bohol atol sa nakalabayng Semana Santa karong tuiga.
Kini ang gipadayag ni Police Major Rey Olar, tigpamaba sa Bohol Police Provincial Office, sa eksklusibong pakighinabi sa Bombo Radyo Cebu News Team.
Matud ni Olar, walay natalang dagkong insidente sa tibuok probinsya, hinungdan nga napadayon ang kalinaw ug kahapsay sa selebrasyon sa Semana Santa.
Gipasalamatan usab niya ang mga Bol-anon tungod sa ilang padayong kooperasyon sa kapulisan, ilabi na sa pagsunod sa mga gipatuman nga safety ug security measures atol sa holiday.
Dugang pa niya, dako ang natabang sa maayong koordinasyon tali sa kapulisan ug sa komunidad, ilabi na sa pagsulod sa daghang mga manguliay ug turista nga mibisita sa Bohol tungod sa long weekend.
Sa kinatibuk-an, gihulagway sa kapulisan nga malinawon ug organisado ang Semana Santa sa probinsya karong tuiga.
