Gipasiugda ni Atty. Kristina Conti nga adunay katungod si kanhi Presidente Rodrigo Duterte sa pagpili sa iyang kaugalingong abogado, apan giingon niyang gusto sa mga biktima nga masiguro nga dili kini mahimong hinungdan sa pagkalangan sa proseso sa kaso.
Sumala ni Conti, bisan pa og adunay katungod ang akusado sa pagpili o pag-ilis sa legal counsel, dili kini awtomatikong magpasabot nga ma-reset ang timetable sa kaso o makahatag og bag-ong legal remedies alang sa depensa.
Gipadayag usab niya nga ang kampo sa mga biktima nagtan-aw pag-ayo sa mga kalamboan may kalabotan sa pag-withdraw sa pipila ka miyembro sa legal team ni Duterte.
Sa pagkakaron, gipasalig ni Atty. Nicholas Kaufman nga ang bag-ong lead lawyer motambong sa status conference nga gikatakdang ipahigayon sa Mayo 27, 2026.
Bisan pa niini, matod ni Conti nga ilang dawaton ang maong development uban sa pag-amping aron masiguro nga dili malangan ang proseso sa husay.
Dugang niya, ang mga biktima mopahayag sa ilang mga panan-aw ug kabalaka pinaagi sa ilang legal representatives nga motambong usab sa korte sa maong petsa.
Matod pa ni Conti, ang kinatibuk-ang sentimiento sa mga biktima mao ang pagduso nga masugdan ang husay sa labing dali nga panahon.
