CEBU CITY-Giduso sa kagamhanang dakbayan sa Sugbo ang pagdili sa mga magbaklay (lakaw), pagbisikleta, pag-skateboard, pagsakay sa e-scooter ug paggamit sa wheelchair nga muagia sa Cebu South Coastal Road (CSCR) sa South Road Properties (SRP).
Kini ang gisugyot sa konseho sa dakbayan ni Cebu City Councilor Rey Gealon, kinsa Chairman sa Committee on Laws, Ordinances and Styling ug pangu usab sa SRP Management Board kung higayong maaprobahan ang ipatuman ordinansa aron panalipdan ang mga disgrasya nga nahitabo sa SRP.
Nunot kini sa panghitabo nga adunay mga batan-on nga mamato sa mga nangaging mga sakyanan nga nakahatag og risgo sa mga motorista.
Sigon sa record nga adunay 2,132 ka mga aksidente ang natala sa dakbayan sa Sugbo diin 239 niini o 11.21% ang nahitabo sa SRP niadtong tuig 2023.
Ang maong sugyot nga ordinansa kay adunay silot nga multa sa P2,000 nga ipahamtang sa mga makalapas niini nga maglakip na sab sa ubang pagbinadlongon sa kadalanan.
Dugang ana nga pasakahan usab kini og kaso sa korte ug adunay dugang P5,000 nga multa para sa mga repetitive offenders.
