Gipahayag sa ICC-accredited lawyer nga si Atty. Rameses Villagonzalo nga natural sa legal nga proseso ang pagduso og daghang ebidensya sa prosecusyon, apan kini nahimo na nga “pamasin” ilabina kay wala pa nagsugod ang opisyal nga trial proper sa kaso ni Kanhi Presidente Rodrigo Roa Duterte.
Sumala ni Atty. Villagonzalo, gitugot sa mga lagda nga mamahimo ra nga magpadayon sa pagdungag og mga ebidensya samtang wala pa ang trial proper.
Tungod niini, naabot na sa kapin 62,000 ka mga panid o kargadong dokumento ang giduso sa prosecution, lakip na ang mga dokumento nga naglakip sa mga giingong “co-conspirators”.
Gipasabot usab sa abogado ang natural nga panag-atbang sa duha ka kampo sa korte diin ang tuyo sa Prosecution kay mamasin ug maningkamot nga mapabug-atan ang tanang sala batok sa akusado pinaagi sa pagbubo sa tanang posibleng ebidensya.
Samtang, tumong sa depensa, ang pamasin ug paningkamot nga maminusan, mapa wala, o mapamatud-an nga walay sala ang ilang kleyente.
Dugang ni Atty. Villagonzalo, tungod sa kanunay nga karga og mga bag-ong pieces of evidence, naabot na sa punto nga daw pirti nang dakoa o sama na sa usa ka balay ang kadaghang mga dokumento nga natipok karon sa kaso.
Gipasiugda usab ni Atty. Villagonzalo nga angay lamang nga ang ICC Main Trial Chamber mismo ang mo-manage ug mopatuman og limitasyon sa mga dokumento nga giduso sa prosecution.
Gikanayon niini nga ang gihimo karon sa prosecution mao ang pagbaha sa tanang kargadong dokumento ug ebidensya. Apan kon i-examine kini, dako ang posibilidad nga daghan niini kay “duplicitous documents” o nagbalik-balik lamang ang unod. Diin dugang niya, ang ubang mga attachment sa usa ka affidavit kay gipang-attach ra usab pag-usab sa uban pang affidavit.
Diin pipila sa mga punto ug epekto nga iyang gipahayag mao ang pagkalangan sa kaso, katarungan sa akusado, nga ang pagkalangan sa kaso kay makaapekto ug makadaot sa “right to speedy trial” o ang katungod sa akusado sa dali ug makatarunganong pagpaminaw sa kaso.
