CEBU CITY – Giangkon ni Cebu City Police Office Director Police Colonel Engelbert Soriano nga pagkaon sa mga police personnel ang ilahang kalisod nga nasugatan niadtong panahon sa Sinulog Festival 2020.
Sa eksklusibo nga pakighinabi sa Bombo Radyo Cebu kang Colonel Soriano, matud pa nga adunay mga panahon nga dugay maka-kaon ang mga pulis hangtod nga madaut na lang ang pagkaon.
Sigon pa nga problema nila ang pag-distribute ingon man ang ‘volume’ sa pagkaon alang sa mga deployed police.
Giingong hilabihan ka sayo ang paghatod sa mga pagkaon hinungdan nga panahon sa ilahang ting-kaon, nadaut na kini.
Gidugang pa sa police director nga problema usab nila ang nag-usab-usab nga panahon diin sulod sa siyam kaadlaw nga kasaulogan, adunay mga higayon nga mauwanan ang mga pulis hinungdan daghan ang nangasakit ug kapin 25 niini ang nalandig pa sa tambalanan.
Apan gitataw ni Colonel Soriano nga bisan pa man sa maong mga problema nagpadayon ang ilahang trabaho sa pagbantay sa seguridad.
Gani, gipasigarbo sa maong police official nga taliwa sa ilahang nasugatan nga kalisod, ilahang napakunhod sa 80% ang crime rate sa dakbayan sa Sugbo atol na sa Sinulog.
