Gitaho sa Department of Environment and Natural Resources (DENR) Region 7 ang malampusong pagpusa ug paggawas sa 79 ka mga itlog sa Green Sea Turtle (Chelonia mydas) gikan sa usa kanesting site sa Panglao, Bohol.
Matod sa DENR, nanggawas ang mga turtle hatchlings niadtoong Hunyo 15 ug luwas nga nakaabot sa dagat ubos sa pagdumala sa mga personahe gikan sa DENR–Panglao Island Protected Seascape (PIPS), sa Panglao Island Restoration and Rehabilitation Program (PIRRP), ug mga empleyado sa Henann Resort.
Ang nesting site, nga nahimutang sa baybayon atubangan sa maong Resort, unang nadokumento niadtong Abril 25, 2026., diin giila sa DENR ang maong dapit isip kabahin sa aktibong puy-anan ug itloganan sa mga pawikan nga moabot hangtod sa baybayon sa Libaong.
Ang mga personahe sa DENR ug ilang mga kaabag nagpatuman og mga pamaagi aron tabangan ang mga pawikan nga motabok sa dagat, lakip na ang pagpalong o pagkunhod sa mga artipisyal nga suga ug ang pagseguro nga walay makatugaw sa palibot sa itloganan.
Matod ni Bohol Provincial Environment and Natural Resources Officer (PENRO) Wilson E. Henson, ang malampusong pagpusa nagpakita sa kaimportante sa koordinasyon tali sa mga ahensya sa gobyerno, mga conservation groups, pribadong sektor, ug lokal nga komunidad sa mga paningkamot sa pagpanalipod sa wildlife.
Gisaysay sa ahensya nga ang mga baybayon sa Panglao nagsilbing importanteng nesting grounds alang sa mga Green Sea Turtle, usa ka species nga gikonsiderar nga endangered ug gipanalipdan ubos sa mga balaod sa kalikopan sa Pilipinas.
Giawhag usab ni DENR Region 7 Officer-in-Charge Regional Executive Director Laudemir S. Salac ang mga lumulupyo ug mga bisita nga suportahan ang mga paningkamot sa konserbasyon sa dagat pinaagi sa pagtabang sa pagmintinar sa kalimpyo sa mga baybayon, pagkunhod sa polusyon, ug pagpanalipod sa mga puy-anan sa dagat ug baybayon.
Matod sa DENR, padayonon ang pag-monitor sa maong dapit-salaganan sa mosunod nga mga adlaw aron makakuha og mga datos human sa pagpusa ug aron masusi ang kondisyon sa maong salag.
