Sugdan na karong adlawa sa Miyerkules, Abril 8 ang pagpang-apod sa Department of Social Welfare and Development – Central Visayas (DSWD-7) sa hinabang pinansyal ngadto sa mga drayber sa tricycle sa rehiyon.
Kabahin kini sa tinguha sa gobyerno sa pag-abag og suporta sa sektor sa transportasyon.
Ang ahensya milatid nga ang ilang regional payout kay ipahigayon sa nagkadaiyang designated sites sa Sugbo ug Bohol aron masiguro ang han-ay og episyente nga distribution process alang sa mga benepisyaryo.
Gani diri sa dakbayan sa Sugbo, ang schedule sa payout kay ipahigayon sa Cebu City Sports Institute Gym sa Barangay Sawang Calero gikan sa alas 8 sa buntag hangtod alas 4 sa hapon.
Samtang sa ubang dapit sa rehiyon kay mag-destino pud kini og mga lugar sa distribution sa payout diin adunay tulo sa Tagbilaran, Bohol ug 12 sa ubang dapit sa Sugbo lakip ang dakbayan sa Mandaue ug Lapu-lapu.
Gikinahanglan lang ang mga benepisyaryo nga magdala sa ilang mga balidong lisensya ug usa ka photocopy niini kauban ang ilang mga pirma.
Adunay kinatibuk-ang 626 ka mga drayber sa tricycle ang syudad diin gikatakda silang makadawat sa P5,000 matag usa.
Giawhag ang mga benepisyaryo nga mutunga sa tukmang oras o mas sayo pa ug musunod sa mga guidelines nga gilatid aron hamugaway ang proseso ang pagpang-apod.
