MINGLANILLA, CEBU-Gimando sa giingong usa ka drug boss, kinsa anaa sulod sa New Bilibid Prison sa Muntinlupa, Metro Manila, ang pagpatay sa lalaki, kinsa gipusil-patay ug kansang lawas gilabay sa bung-aw sa Camp 7, lungsod sa Minglanilla sa miaging semana.
Kini ang gitino ni Police Captain Kelvin Jomari Golitod, hepe sa Minglanilla Police Station, nga ang pagpusil kang Dhinz Adzyl Zabala, 32, taga Barangay Sambag, dakbayan sa Sugbo, giingong drug-related nga pagpatay.
Matud pa ni Golitod nga ang biktima nga si Zabala giingong napakyas sa pag-remit sa pipila ka kita sa giingong pagpamaligya og ilegal nga drugas hinungdan nga gipusil-patay kini.
Dugang pa, nga nahibaw-an kining maong impormasyon human nasikop ang duha ka suspek nga giingong maoy nipatay sa biktima niadtong Septiyembre 21.
Ang gitumong ni Golitod mao ang higala ug silingan sa biktima, kinsa ginganlan nga si Junjun, ug ang giingong gun-for-hire, kinsa ginganlan nga si “Tepan.”
Gihulagway usab niini nga si Junjun giingong tigbaligya og drugas.
Nasikop si Junjun sa Barangay Sambag sa dakbayan sa Sugbo niadtong Septiyembre 21 ug si Tepan nadakpan sa samang adlaw sa Talisay City.
Nakuha gikan kang Tepan ang usa ka kalibre .45 nga pistola.
Matod sa hepe sa kapulisan nga nagpahigayon sila og ballistic test sa pusil aron masuta kon mao ba kini ang pusil nga gigamit sa pagpatay.
Base sa imbestigasyon nagpakita nga si “Junjun,” kinsa giingong tigbaligya og drugas, nagdala sa biktima sakay sa iyang motorsiklo ngadto sa Camp 7 sa lungsod sa Minglanilla sa tungang gabii sa Septiyembre 18.
Sa inisyal nga imbestigasyon nagpakita nga si Zabala wala pugsa sa pag-adto sa lugar diin siya gipatay.
Giingong nitug-an si Junjun sa kapulisan nga nisalig kaniya ang biktima tungod kay higala ug silingan kini, ug ang biktima boluntaryong nisakay sa motorsiklo ni Junjun paingon sa dapit diin siya gipatay tungod kay gisultihan ni Junjun ang biktima nga aduna silay trabaho didto.
Ang suspek ug ang biktima nga pareha ug amo sa negosyo sa ilegal nga drugas sa usa ka prisohan sa Metro Manila giingong nimando sa pagpatay kang Zabala human kini giingong napakyas sa pag-remit sa iyang kita sa pagpamaligya og ilegal nga drugas.
