Gipasabot ni Balbino “Ka Bino” Guerrero, OIC sa Cebu City Public Library ug usa ka Heritage Advocate, nga adunay daghang katarungan ug kalainan sa paggamit sa mga alyas o mga ngalan nga gikuha gikan sa uban.
Sumala kaniya, ang paggamit sa mga ngalan sama sa nom de plume o penname ug nom de guerre o mga ngalan sa gubat sa mga bayani o manggugubat gihimo aron mapanalipdan ang ilang kaugalingon ug ang ilang mga pamilya.
Gipunting usab niya nga ang paggamit sa mga alyas sa mga rebolusyonaryo ug bayani sa nangagi, sama ni Leon Kilat ug uban pa, usa ka natural nga paagi sa pagpakig-away.
Apan matod ni Ka Bino, dili husto ang pagtandi o paglakip sa mga ngalan nga gikan sa mga alyas sa confidential funds o kadtong walay klarong rason ug konteksto.
Samtang nagpahayag og pagtahod sa pamahayag ni Senador Robin Padilla, iyang gipahinumdoman nga ang katuyoan ug kasaysayan sa paggamit sa mga ngalan sa atong mga bayani lahi kon itandi sa kasamtangang mga isyu.
Gipahayag usab ni Balbino “Ka Bino” Guerrero nga usa ka dakong pamasangil ug “kawalay klaro” nga itandi ang mga alyas sa atong mga nasudnong bayani sa mga modernong alyas nga gigamit sa kontrobersiyal nga pondo.
Iyang gihatag nga ehemplo ang mga sakripisyo nila Jose Rizal, Ninoy Aquino, ug Andres Bonifacio nga nagbuwis sa ilang kinabuhi para sa kagawasan sa nasod.
Mao nga alang kaniya, ang pagbandera o pagtandi sa nom de guerre ug nom de plume sa atong mga bayani ngadto sa maong mga alyas sa pondo pampubliko usa ka insulto sa ilang kabilin ug handumanan.
