Miulbo pag-usab ang tensyon tali sa Iran ug Estados Unidos human sa mga report nga nagpakita og sunod-sunod nga managlahi ug posible nga direktang mga panaghisgot sa Pakistan karong hinapos sa semana.
Sumala sa Iranian state broadcaster nga IRIB, si Foreign Minister Abbas Araghchi wala magplano nga makigkita direkta sa mga opisyal sa US sa Pakistan.
Apan ang Islamabad mahimong magsilbing “tulay” aron ipaabot ang posisyon sa Iran may kalabotan sa posibleng paagi sa pagtapos sa gubat.
Samtang, giingon sa White House nga gipadala nila si Steve Witkoff ug Jared Kushner sa Pakistan human mikaylap ang report nga nangayo ang Iran og face-to-face nga panaghisgot.
Sumala sa usa ka opisyal sa Pakistan nga gikutlo sa report, ang mga delegasyon sa Estados Unidos ug Iran magpahigayon una og managlahing pakighinabi sa mga opisyal sa Pakistan sa wala pa ang posibleng direktang panaghisgot sa Domingo, kung maayo ang unang hugna sa negosasyon.
Miabot si Araghchi sa Pakistan niadtong Biyernes sa gabii (lokal nga oras) alang sa managlahing mga panaghisgot bahin sa bilateral nga isyu tali sa Iran ug Pakistan.
Sa samang higayon, ang US Treasury nagpahamtang og bag-ong mga silot batok sa Iran, diin gilakip ang mga 40 ka entidad ug mga tanker sa blacklist ug gi-freeze ang mga $344 milyon nga crypto assets.
Sumala ni US Treasury Secretary Scott Bessent, ang tumong sa lakang mao ang pagtarget sa “financial lifelines” sa gobyerno sa Iran samtang nagpadayon ang tensyon sa rehiyon.
