Mihatag og mensahe si Presidente Ferdinand “Bongbong” Marcos Jr. diin mitimbaya sa mga atleta nga mipaambit sa ilang dedikasyon bitbit ang ngalan sa ilang tunghaan ug ang pangandoy sa matag usa, ingon man nga mipasalig kini nga padayon ang gobyerno sa pasuporta sa ilang padayon nga pagbansay sa kahanas sa nagkandaiyang natad sa paugnat sa kusog.
Malipayon usab nga gipahibalo ni Marcos nga sa unang higayon, ang mga medalista sa Palarong Pambasa makadawat og mga insentibo gikan sa Philippine Sports Commission.
Apil niini ang tanang medalista sa regular nga mga dula ug paralympic games.
Nagtuo si House Speaker Faustino “Bojie” Dy III nga ang 2026 Palarong Pambansa dapat mahimong inspirasyon aron daghang kabataang Pilipino nga mangandoy, maningkamot ug magtuo sa ilang abilidad.
Matud ni Dy, dako ang papel sa sports sa paghulma sa disiplina, kalig-on, ug liderato sa kabataan dungan sa pagklaro nga ang Palarong Pambansa dili lang kompetisyon alang sa medalya apan usa usab ka pagsaulog sa kakugi, sakripisyo, teamwork, ug pagpaningkamot sa mga estudyanteng atleta gikan sa lain-laing bahin sa nasud.
Dugang ni Dy, daug na ang tanang mga misalmot tungod sa ilang dedikasyon ug paningkamot nga nakapadangat kanila sa nasudnong padula.
Gidani usab niya ang mga atleta nga makigkompetensya uban sa integridad ug dungog samtang nagrepresentar sa ilang eskwelahan, komunidad, ug rehiyon.
