CEBU CITY-Opisyal ng gilusad ang labing una nga Palarong Pambansa App gahapon Martes, Hulyo 2, 2024, atol sa press conference sa Cebu City Hall ug mamahimo na kining ma-download karong Biyernes.
Diin ang nasangpit nga app adunay komprehensibo nga impormasyon bahin sa kalihokan, lakip ang mga detalye sa mga katambayayong sa kalihokan, mga lugar alang sa matag duwa, mga iskedyul sa kalihokan, mga direksyon pinaagi sa Google Maps, real-time nga live streaming sa matag duwa, ug medal tally alang sa matag rehiyon.
Gawas sa Palarong Pambansa updates, ang app maglakip sa tourism section aron sa pag-promote sa mga tourist spots sa Cebu City ug usa ka news section alang sa mga update sa panghitabo, importanteng pahibalo, ug alerts.
Nasayran nga nanguna si Acting Mayor Raymond Alvin Garcia sa paglusad sa Palaro App, kauban si Cebu City Sports Chairman John Pages, President ug Chief Executive Officer sa UBX John Januszczak, ug Senior Vice President ug Chief Operating Officer Anton Percides.
Ang Palaro App gimugna sa AboitizPower uban sa pakigtambayayong sa UBX nga nagtumong sa pagpalambo sa kasinatian alang sa mga atleta ug sa ilang mga pamilya.
