CEBU – Gikoronahan si Mia Loureen Tamayo sa Carcar City isip Pasigarbo sa Sugbo Festival Queen karong tuiga.
Girepresentar ni Tamayo ang bantogang Kabakaban Festival sa dakbayan ug mipildi sa laing 39 ka mga kandidato, nga nakakuha og back-to-back nga kadaugan alang sa Carcar City sa paindigay sa Pasigarbo sa Sugbo Festival Queen.
Si Marla Alforque nga 2019 Pasigarbo sa Sugbo Festival Queen ug Gov. Gwendolyn Garcia maoy nitaod sa korona ni Tamayo atol sa coronation night nga gipahigayon sa Cebu City Sports Center, Biyernes, Agosto 26, 2022.
Gawas niini, nakuha usab ni Tamayo ang duha ka special awards alang sa Best in Group Production Presentation ug Best Solo Performer.
Samtang, nakuha ni Quitari Semblante sa Liloan City-Rosquillos Festival ang Best in Costume ug nipwesto isip 4th runner-up; Justine Joy Mañacap sa Municipality of Minglanilla – Sugat Kabanhawan Festival isip 3rd runner-up; Lorraine Hann sa Municipality of Barili – Panumod Festival isip 2nd runner-up ug Miss Photogenic Award; ug 1st runner-up ang kandidata nga si Krisha Andrea Pekitpekit sa Municipality of Cordova – Dinagat Festival.
Ug Miss Friendship ang nakuhang award ni Chella Grace Falconer sa Mandaue City – Panagtagbo Festival.
