Gitawag ni National Security Adviser Eduardo Año nga walay basehanan ug ‘revisionist’ ang mga pangangkon sa China sa Palawan.
Sa usa ka pamahayag, ang opisyal miingon nga ilang gisupak ang walay basehanan ug revisionist nga mga pangangkon nga mikatap sa Chinese social media nga ang Palawan kanhi kabahin sa China ug kinahanglang ibalik sa China.
Ang National Security Adviser miingon usab nga kini nga pamahayag usa ka dayag nga ‘katha’ nga gitumong sa pagtuis sa kasaysayan, pagpahisalaag sa publiko, ug paghagit sa soberanya sa Pilipinas sa iyang lehitimong teritoryo nga giila sa tibuok kalibutan.
Gidugang sa opisyal nga ang Palawan kay dugay na ug magpabiling importanteng bahin sa Republika sa Pilipinas.
Ingon man nga walay record sa kasaysayan, legal precedent o katuohan nga ebidensya nga nagsuporta sa pangangkon nga ang Palawan kaniadto gidumalaan sa China.
Matod sa opisyal, ang klarong pruweba nga ang Palawan iya sa Pilipinas mao ang archaeological findings, mga dekadang indigenous ug colonial governance ug internationally binding treaties sama sa 1898 Treaty of Paris ug 1900 Treaty of Washington.
Gitawag usab ni Año nga mugna lang ang pag-angkon nga ang Palawan nga gitawag og Zheng He island kaniadto nga gikan sa ngalan sa usa ka Chinese explorer nga daw mibiyahe sa kadagatan sa Southeast Asia niadtong ika-14 ug ika-15 nga siglo, usa ka walay basehanan nga katha.
Matod niya walay rekord sa kasaysayan nga makapamatuod nga mibisita siya sa Palawan ug kon aduna man, dili kini katumbas sa pagpanag-iya sa isla, tungod kay ang mga biyahe sa mga biyahedor sa karaang panahon dili makausab sa soberanya sa mga nasud karon.
Kalabot niini, giingon sa opisyal nga ilang gisubay karon ang tinubdan sa sayop nga impormasyon nga unang nigawas sa Chinese social media apps nga Weibo ug Red Note. Hinuon, gipasiugda ni Año nga wala kini gikan sa bisan unsang opisyal nga mga site sa gobyerno o gitaho sa mga mainstream media outlet sa China.
Ang NSC nag-awhag sa katawhang Pilipino ug sa internasyonal nga komunidad nga magpabiling mabinantayon batok sa disinformation nga mga kampanya ug magsalig lamang sa napamatud-an nga historikal ug lehitimong tinubdan.
