Nipahibawo ang Department of Justice (DOJ) nga plano nilang hangyoon ang pagkansela sa pasaporte ni Atty. Harry Roque.
Matod pa nga gituyo sa departamento nga himuon kini dungan sa mga isyu nga giatubang sa kanhi presidential spokesperson ni Kanhi Presidente Rodrigo Duterte nga atua na karon sa The Hague, Netherlands.
Kini ang gikompirmar ni Justice Secretary Jesus Crispin Remulla dihang gipangutana bahin sa sitwasyon sa kaso ni Roque.
Kasamtangang anaa sa gawas sa Pilipinas ang abogado, partikular sa The Netherlands diin midangop siya sa langyaw nga gobyerno para sa asylum application.
Tungod niini, gipaambit sa kalihim sa DOJ nga kung hingpit nga makanselar ang passport sa kanhi presidential spokesperson, makonsiderar siya nga ‘undocumented alien’.
Matud pa nga posibling mosangpot sa ‘deportasyon’ si Roque ug ibalik siya sa nasud diin siya nag-atubang og mga kaso.
Apan bisan pa niini, hugot gihapon nga gibarogan sa habig ni Roque nga walay mahimo ang kagamhanan sa pagdakop kaniya.
Gitataw niya nga aduna pa siyay pending nga asylum application sa maong nasud busa di siya basta-basta ma-deport balik sa Pilipinas.
Samtang, giangkon ni Remulla nga kinahanglang mahuman una ang proseso sa asylum sa dili pa si Roque mahimong dakpon o hingpit nga ibalik.
Masaligon si Remulla nga ang gobyerno sa The Netherlands, nga magdesisyon sa aplikasyon sa asylum nga husto ug adunay igong proseso.
Busa, bisan ang Chief State Counsel sa departamento nga si Arvin Dennis Chan mipaambit nga ang usa ka indibidwal kay dili mahimong dakpon samtang ang iyang asylum application kay gidungog pa.
