Sa tinguha sa usa ka pastor nga mapatud-an ang kaisog susama sa istorya ni Moises sa Red Sea, gisuwayan niini nga tungaon ang dagat.
Apan ang kaisog kay miatras sa dihang ang dakong balud ang nisugat ug nihapak nga maoy nakaaghat kaniya nga magdali-dali ug atras apan naabtan gihapon kini sa balud.
Ang pastor nga si Evans Eshun, nga mas nailhan isip “Ebo Noa” una nang nahimong sentro sa atensyon tungod sa iyang propesiya bahin sa usa ka dakong baha ug sa iyang paghimo og arko isip pagpangandam niini.
Sa pinakabag-ong viral video, makita ang pastor nga inanay pa paingon sa baybayon samtang nagkupot og sungkod. Mitamak kini sa tubig-dagat nga miabot sa iyang hawak ug nagsugod pag-alsa sa iyang kamot samtang naglitok og mga pulong nga gituohang pag-ampo o pagpanawag og milagro.
Gipakpakan ug gi-cheer pa siya sa iyang mga supporters nga nagpaabot nga adunay mahitabo nga talagsaong panghitabo.
Apan imbes nga matunga ang dagat, kalit siyang gihampak sa kusog nga balud nga maoy nakapawala sa iyang balanse ug nakapatumba kaniya.
Bisan pa sa iyang pagsulay, wala matuman ang gipaabot nga milagro ug nagpabiling normal ang dagat, samtang ang maong insidente padayon nga gihisgutan ug gipaambit sa social media.
