Gipaniguro sa Philippine Health Insurance Corporation kon PhilHealth nga malakip sa ilang benepisyo sa pagtambal ang mga pasyente nga adunay dengue ug leptospirosis.
Matod sa PhilHealth, moabot sa P13,000 ang madawat sa mga pasyente nga adunay dengue fever, samtang moabot sa P16,000 ang madawat sa mga grabeng dengue hemorrhagic fever.
Sa laing bahin, ang adunay leptospirosis makapahimulos sa benepisyo nga moabot sa P14,300.
Kini nunot sa nagkadaghang kaso sa dengue ug leptospirosis sa nasod karong tuiga.
Base sa datus sa Department of Health, kapin sa 200,000 ka kaso sa dengue ang natala sa unang semana sa Septiyembre.
Samtang, ang PhilHealth nakabayad og kapin sa P14.7 milyones sa leptospirosis claims, ug kapin sa P1 bilyon alang sa dengue sa unang tunga sa tuig 2024.
