Narekober sa search and retrieval team ang patayng lawas sa usa ka lalaki gikan sa nahugno nga building sa Barangay Balibago, Angeles City, Domingo sa buntag, Mayo 31, 2026.
Sumala ni Angeles City Mayor Carmelo Lazatin II, nakit-an sa mga rescuer ang usa ka vaccination card duol sa nahimutangan sa lawas sa biktima nga mahimong makatabang sa pag-ila niini.
Bisan pa man niini, gipahayag sa mayor nga ipailalom gihapon ang patayng lawas sa makuting proseso sa Disaster Victim Identification (DVI) pinaagi sa forensic experts sa Philippine National Police (PNP) aron maseguro ang tinuod niining pagkatawo sa dili pa kini i-turnover sa pamilya.
Samtang, nagpadayon ang dinalian nga operasyon sa pagpangita, pagrekober, ug paghawan sa dapit sa trahedya.
Gigamit na sa mga emergency responders gikan sa Bureau of Fire Protection (BFP), City Disaster Risk Reduction and Management Office (CDRRMO), ug mga lokal nga kagamhanan ang mga bug-at nga makinarya ug K9 search dogs tungod kay duna pa gihapong gikatahong mga nawala nga gituohang natabunan sa ilalom sa mga guba nga semento ug puthaw.
Sa pagkakaron, gipalibutan na sa police line ang dapit ug temporaryong gisirad-an ang mga kasikbit nga dalan alang sa seguridad sa publiko ug aron dili mabalda ang nagpadayong operasyon sa mga otoridad.
