CEBU CITY-Nadesisyonang ilubong sa daling panahon sa kabanay sa nasunog nga 13-anyos nga batang lalaki sa panghitabo sa sunog nga nahitabo sa Sitio Lower Galile, Barangay Duljo Fatima ning dakbayan sa Sugbo, kagahapong adlawa sa Dominggo, Enero 5, 2025.
Gikatahong karong adlawa sa Lunes, Enero 6 ilubong sa Veteran’s Cemetery sa Barangay Labangon sa dakbayan sa Sugbo ang nasunog nga patayng lawas ni Wrenchford Rey Abala Cahan matod pa sa pamilya niini.
Samtang gibutyag sab sa buhatan sa Cebu City Department of Social Welfare and Services (DSWS) nga agakon sa kagamhanang dakbayan sa Sugbo ang gastohon sa punerarya og menteryohan sa lawas ni Wrenchford Rey.
Sa pikas bahin, gibutyag sab ni Senior Fire Officer 2 Wendell Villanueva, ang tigpamaba sa Cebu City Fire Office pinaagi sa eksklusibong pakighinabi sa Bombo Newsteam niini nga padayon pa ang ilang gilusad nga imbestigasyon mahitungod sa hinungdan sa sunog nga nakapaugdaw og 25 ka mga panimalay, gatosan ka mga indibidwal ang nabiktima, ug kapin P900,000 sa danyos sa mga kabtangan ang naabo sa maong insidente.
