Gihimug-atan ni Presidente Ferdinand Marcos Jr. nga ang mga Pilipino makabenepisyo gikan sa Pax Silica Industrial Hub nga tukuron sa New Clark City, Tarlac, nga gilauman nga mahimong sentro sa artificial intelligence (AI) manufacturing ug logistics sa nasud.
Sa iyang ikalima nga State of the Nation Address (SONA) niadtong Lunes, ang Chief Executive miingon nga ang 1,600-ektarya nga industrial hub magmugna og AI ecosystem nga maghatag og dekalidad nga mga trabaho, magpalig-on sa mga kapabilidad sa industriya sa Pilipinas, ug magdasig sa ekonomiya.
Gidugang sa Presidente nga ang proyekto sa Luzon Economic Corridor mahimong usa ka importante nga bahin sa advanced manufacturing sa global AI ug technology value chain.
Bisan pa, ang proyekto nakadawat og kritisismo tungod sa gilauman nga taas nga konsumo sa kuryente ug tubig, nga kasagaran gikinahanglan sa mga pasilidad sa AI.
Gikuwestiyon usab ni ACT Teachers Party-list Representative Antonio Tinio ang proyekto.
Sumala niya, ang Pilipinas mahimong kabahin sa supply chain para sa military-industrial complex sa Estados Unidos ubos sa Pax Silica initiative.
Giinsistir ni Tinio nga imbes nga tinuod nga kalamboan sa ekonomiya, kini mahimong magsilbing estratehikong interes sa Amerika sa produksiyon sa mga semiconductor ug uban pang abanteng elektroniko nga magamit sa mga aplikasyon sa militar.
