Gihagit ni Senate Deputy Minority Leader Risa Hontiveros si Presidente Ferdinand Marcos Jr. nga manguna sa pagpaubos sa lifestyle check taliwala sa kontrobersiya ug imbestigasyon kalabot sa anomalosong mga flood control projects.
Nagtuo kini nga ang lifestyle check makatabang sa pagpakunhod sa grabeng kurapsyon sa paggamit sa pundo sa publiko alang sa mga proyekto sa gobyerno.
Giinsister niini nga kon momando ang Presidente og lifestyle check sa mga opisyal sa gobyerno, angayan lang nga maghatag siya og ehemplo pinaagi sa pagpahibalo sa iyang Statement of Assets, Liabilities, and Net Worth o SALN.
Ingon man ang pag-lifestyle check usab sa mga asawa.
Samtang, masaligon ang Malacañang nga magpabiling independente ug non-partisan ang imbestigasyon nga ipahigayon sa Department of Public Works and Highways (DPWH) sa lifestyle ug assets sa mga opisyal niini.
Kini ang gipahayag ni Communications Undersecretary Claire Castro human gimando ni Presidente Ferdinand R. Marcos Jr. ang paglusad sa lifestyle check sa mga opisyal sa buhatan, taliwala sa imbestigasyon sa mga palpak nga proyekto sa pagkontrolar sa baha sa tibuok nasod.
Sa press briefing sa Malacañang, ang opisyal niingon nga tungod kay ang Presidente mismo ang naghatag sa mando, ang matag ahensya sa gobyerno kinahanglang molihok ug motuman sa ilang mga katungdanan.
