Gipasalig sa Malacañang nga manubag ang mga nagpaluyo sa tanim-bala scheme sa Ninoy Aquino International Airport (NAIA) kung mapamatud-an nga nibalik na kini nga modus sa mga tugpahanan.
Kini ang pamahayag ni Communications Usec Claire Castro, subay sa video nga nag-viral sa social media, diin na-intercept ang bagahe sa usa ka senior citizen sa airport niadtong Marso 6, human giingong adunay mga bala o anting-anting sa iyang mga butang.
Sa press briefing sa Malacañang, ang opisyal niingon nga dili maayo nga mahitabo pag-usab ang maong modus ilabi na nga mga turista o kaubang Pilipino ang mabiktima.
Gipasalig ni Castro nga dili kini tugotan ni Presidente Marcos.
Matud pa sa opisyal, sa panahon nga mahuman na ang lawom nga imbestigasyon sa maong insidente, ug mapamatud-an nga adunay pipila nga nakigkunsabo niini, makapaabot ang publiko nga matangtang sila sa serbisyo.
