Gidepensahan ni Cebu City Mayor Nestor Archival ang iyang wala pagtambong sa opisyal nga paghandum sa dakbayan alang sa West Philippine Sea (WPS) Victory Day, ug gipahayag nga ang iyang opisyal nga biyahe sa Manila mas nakahatag og malungtarong kaayohan ug dugang nga pondo alang sa mga Sugboanon.
Kini human sa pahayag ni Vice Mayor Tomas Osmeña nga nagsaway sa mayor ug miakusar kaniya nga ‘playing it safe’ human wala motambong sa seremonya taliwala sa diplomatic protest sa China batok sa resolusyon sa siyudad.
Matod ni Osmeña, angay nga mobarog ang liderato sa dakbayan alang sa soberanya sa nasod ug dili magpanuko sa pagpahayag sa maong baroganan.
Apan sa iyang opisyal nga tubag, giklaro ni Mayor Archival nga ang tinuod nga serbisyo publiko dili masukod sa presensya sa usa lamang ka kalihokan, kondili sa pagpaningkamot nga makakuha og mga programa, suporta, ug mga kahinguhaan alang sa dakbayan.
Gipasabot sa mayor nga samtang gipahigayon ang maong selebrasyon sa Sugbo, anaa siya sa Manila aron motambong sa duha ka importanteng tigom, lakip ang Boy Scouts of the Philippines (BSP), aron mapalig-on ang partnership alang sa pagpalambo sa kabatan-onan sa Dakbayan sa Sugbo.
Gipahayag usab ni Archival nga nakahigayon siya og produktibong pakigpulong uban kang DBM Secretary Kim de Leon aron sundon ang hangyo sa dakbayan alang sa Local Government Support Fund (LGSF), nga magamit sa mga prayoridad nga proyekto sa imprastraktura sa siyudad.
Gipasalig ni Archival nga nagpabilin nga lig-on ang iyang komitment sa pagserbisyo ug ang walay hunong nga pagtrabaho ug pag-una sa labing maayong interes sa katawhan sa Dakbayan sa Sugbo.
