Gimandoan ni Presidente Ferdinand R. Marcos Jr. ang mga hingtungdan nga ahensya nga makigtambayayong sa pribadong sektor aron mapadali ang pag-establisar ug dugang mga classroom sa publikong eskwelahan sa Rehiyon sa Ilocos.
Gihatagan og gibug-aton ni Marcos ang panginahanglan sa pagpadayon sa public-private partnerships (PPPs) aron mapadali ang pagtukod sa dugang nga mga lawak-saringan sa rehiyon atol sa tigom uban sa Regional Development Council sa Dagupan City, Pangasinan.
Si Presidente Marcos nag-ingon nga ang publiko nga imprastraktura ug mga proyekto sa kalamboan mahimong mapatuman nga mas paspas ug sa mas mubu nga gasto sa gobyerno pinaagi sa pagsulod sa mga kontrata sa pribadong sektor pinaagi sa PPP.
Sa pikas bahin, gisugyot sa Department of Education (DepEd) ang pagtukod sa dul-an sa 3,000 ka mga classroom sa Ilocos Region gikan sa 2025 hangtod 2030.
Giila ni Marcos ang mga paningkamot sa DepEd sa pagpausbaw sa literacy rate sa Rehiyon sa Ilocos, nga tradisyonal nga mas taas sa nasudnong average.
Ubos sa budget plan niini alang sa 2026, ang DepEd misugyot sa pagkuha og dugang school principals, administrative officers, school counselor associates ug project development officers alang sa rehiyon.
Gipuno usab sa DepEd ang mga bakanteng posisyon sa pagtudlo sa rehiyon, samtang nagpahigayon sa tinuig nga paghimo ug pagpadala sa mga butang sa pagtudlo.(Bombo Irene Ardiente)
