Nipirma og P25.8-bilyones nga kontrata ang Philippine Coast Guard (PCG) sa French shipbuilding company nga OCEA S.A. alang sa pagpalit og 40 ka units sa 35-meter Fast Patrol Craft (FPC).
Kabahin kini sa programa sa Modernization sa ahensya nga giisip sa sektor sa maritime sa nasud ang lakang ingon man sa usa ka bag-ong milestone.
Ang kontrata gipirmahan ni French Ambassador to the Philippines Marie Fontanel ug Transportation Secretary Vince Dizon, kauban ni Philippine Coast Guard Commandant Admiral Ronnie Gil Gavan ug Mr. Roland Joassard, Chief Executive Officer sa maong French shipbuilder.
Ang pagpalit sa bag-ong mga patrol boats subay sa direktiba ni Presidente Ferdinand Marcos Jr. sa pag-upgrade sa maritime security ug operational capabilities sa PCG.
Gilauman nga makapalig-on sa lig-on nga relasyon tali sa Pilipinas ug France ang proyekto sa natad sa maritime safety ug development.
Matod ni Commandant Admiral Gavan nga ang mga patrol boat gamiton sa pagmonitor sa West Philippine Sea taliwala sa nagpadayong tensyon sa China.
Gamiton usab sila sa pagpalapad sa mga operasyon sa PCG aron matubag ang mga hagit sa kadagatan sama sa pagdugang sa trapiko sa kadagatan ug pagdaghan sa mga insidente sa ilegal nga kalihokan sa kadagatan sama sa ilegal nga pagpangisda, smuggling, piracy ug maritime terrorism.
Ang high-speed multi-role vessels gamiton usab alang sa rescue, relief ug emergency operations panahon sa kalamidad ug maritime incidents.
Ubos sa kontrata, 20 ka units ang mugnaon sa France samtang ang katunga himoon sa Pilipinas.
