Naglusad og search and rescue operations ang Philippine Coast Guard (PCG) para sa 21 ka Pilipinong tripulante sakay sa nalunod nga cargo vessel nga M/V Devon Bay nga puno sa iron ore duol sa Scarborough o Panatag Shoal.
Gipadala sa PCG ang duha sa mga barko niini, ang BRP Teresa Magbanua ug BRP Cape San Agustin, ingon man ang duha ka PCG aircraft aron pangitaon ang mga tripulante sa cargo vessel.
Base sa inisyal nga mga report, ang cargo vessel mibiya sa Gutalac, Zamboanga del Sur ug naglawig padulong sa YangJiang, China sa dihang nahitabo ang insidente.
Katapusang nakit-an ang barko duol sa Sabangan Point, Agno Bay, Pangasinan niadtong gabii sa Enero 22, nga sakop sa exclusive economic zone sa Pilipinas.
Niadtong Biyernes, ang PCG Command Center nakadawat og impormasyon gikan sa Hong Kong Maritime Rescue Coordination Centre nga 10 sa 21 ka Pilipinong tripulante ang naluwas sa usa ka barko sa China Coast Guard (CCG) nga miagi.
Ang barko sa CCG nagpahigayon sa humanitarian mission subay sa UN Convention on the Law of the Sea, nga nagmando sa tanang estado sa paghatag og tabang sa mga indibidwal nga anaa sa kalisud sa dagat, lakip na ang pag-agi sa mga maritime zone o hurisdiksyon sa ubang mga estado.
Sumala sa tigpamaba sa PCG nga si Capt. Noemie Cayabyab, ang Coast Guard nagpadayon sa pagmonitor sa sitwasyon ug nagpabilin nga hingpit nga komitado sa pagsiguro sa kaluwasan sa ubang mga Pilipinong tripulante.
