Mitunol sa reward para sa upat ka mga impormante ang buhatan sa Philippine Drug Enforcement Agency – Central Visayas (PDEA -7) karong adlaw sa Miyerkules, Disyembre 17 diin ang mga indibidwal kay sakop sa ilang programang “Operation Private Eye” sa pagsumpo sa ginadiling droga sa rehiyon.
Ang mga impormante nakadawat sa cash reward sa kinatibuk-ang P775,000 nga bahinon nilang upat human sila mihatag og impormasyon sa PDEA-7 aron masikop ang mga tigpahuyot og droga pinaagi sa nalusad nga mga buy-bust operations.
Sa susamang kalihokan, ang PDEA-7 sab misunog sa kapin P468.12-milyones nga balor sa ginadiling droga sa usa ka funeral home sa downtown Cebu City aron dili na kini mabalik sa sirkulasyon sa kadalanan.
Ang mga droga kay gilangkoban sa 68,000 grams sa shabu, 866.64 grams sa marijuana ug 387 grams sa uban pang expired nga mga tambal.
Ang kalihokan kay gipangulohan ni Dangerous Drugs Board Chariperson Oscar Valenzuela, PDEA Director General Usec. Isagani Nerez, ug PDEA-7 Regional Director Joel Plaza sa ilang gipamulong nga dakong kalampusan sa ahensya diri sa rehiyon sa pagpugong sa ginadiling drogas nga mukatap sa publiko.
