CEBU CITY – All set na ang oath taking sa mga miyembro sa Partido Demokratiko Pilipino-Lakas ng Bayan o PDP-Laban nga ipahigayun sa Plaza Independencia, dakbayan sa Sugbo karung alas 2 sa hapon.
Sa pakighinabi sa Bombo Radyo kang Cebu City Councilor Raymund Garcia, gipadayag niini nga wala na’y makapugung pa kanila nga manumpa ubus sa PDP-Laban.
Gibutyag ni Garcia nga gibana-banang mu-abut sa 50,000 ka mga opisyal ug political leaders lakip na niini ang mga supporters ang mutapun sa partido ni Presidente Rodrigo Duterte.
Lakip sa mga manumpa ang mga mayor sa nagkadaiyang kalungsuran ug dakbayan sa Sugbo nga kanhi kaalyado sa Liberal Party.
Giklaru usab sa nahisgutang opisyal nga ang ilahang pagtapun sa PDP-Laban arun nga supurtahan ang mga proyekto ni Presidente Rodrigo Duterte kung diin ilahang nakita nga maayu man ang pagdala niini sa nasud.
Panguluhan usab nila ni House Speaker Pantaleon Alvarez ug Senate President Koko Pimentel ang nahisgutang mass oath taking.
Gikalipay usab sa partidong One Cebu nga gipanguluhan ni Deputy Speaker Gwendolyn Garcia ang pagdaghan sa mga mitapun sa PDP-Laban.
Nasayran nga ang One Cebu ang local party sa PDP-Laban dinhi sa Sugbo.
