Cebu City-Gipanawagan sa Direktor sa Criminal Detection and Investigation Group -7 ang negosyante nga si Peter Lim aron ipahibawo kaniya nga aduna kini subpoena sa buhatan sa CIDG subay na sa ipahigayon nga imbestigasyon sa maong buhatan batok kaniya.
Matud ni CIDG 7 Director Royina Marzan Garma nga gipapangita na niya sa iyahang sakop si Lim , apan mas maayo kung mupatim-aw mismo ang negosyante o ang iyang abogado sa ilahang buhatan. Kini human nga nakadawat ug kamandu-an gikan sa uluhang buhatan sa CIDG si Garma aron nga ipaubos sa background ug financial investigation si Lim human kini mahinganle ni Presidente Rodrigo Duterte nga usa sa mga bigtime drug lords sa nasud. Matud ni Garma nga gikinahanglan nga mupatim-aw sa ilahang buhatan si Lim karong buwan sa Agosto aron nga masugdan ang imbestigasyon.
Gipasabot ni Garma nga ilang sutaon ang back ground ni Lim , apil na ang mga negosyo niini ug ang standing niini sa komunidad. Pananglitan nga makitaan ug mga irregularidad o mga kalambigitan sa illegal nga negosyo murekomendar sila nga pasakaan og kaso ang negosyante.
Nasayran nga gawas ni Lim, imbestigahan usab sa CIDG ang uban pang mga personalidad sa Sugbo nga una ng gitumbok sa Presidente nga nalambigit sa sa illegal nga drogas sama nilang Franz Sabalones, Daanbantayan Mayor Vicente Loot ug mga kapulisan nga kanhi na assign sa PRO7 apan karon tua na nadestino sa Mindanao.
Gibutyag naman ni Garma nga dili lalim ang pagpahigayon ug financila investigation gumikan sa bank secrecy law ingon man ang mga patakaran nga gipatuman sa mga ahensya nga posible makuhaan nila og mga documento nga ilang gikinahanglan. Subay niini, gihangyo ni Garma ang kooperasyon sa mga government offices ingon man mga government officials nga mahimo nga makatabang sa ilahang imbestigasyon.
