Nisang-at na og Petition ngadto sa korte ang mga Officer sa United Mabolo Elderly Organization batok sa Cebu City Government ug sa Sangguniang Panlungsod, kabahin na sa bag-ong pamaagi sa pagpang apod-apod sa mga cash assistance sa mga senior citizen.
Matud ni Brgy. Mabolo Captiain Daniel Arguedo nga ang Petition for Declaratory Relief mao ang pagsupak sa binuwan nga pag-release sa cash assistance nga tag 1,000 sa mga senior citizen sa Cebu City, tungod kay hasol sa habig sa mga katiguwangan, ug buot nga mas maayo nga itingob nalang og hatag ang naandan nga 3,000 pesos matag tulo ka buwan.
Mao kini ang naasoy ni Kapitan Arguedo atol sa ekslusibong pakighinabi sa Bombo Radyo Cebu team kaniya. Iyahang giklaro nga wala bisan og nagfile na og kaso, kini wala nagpasabot nga babag siya sa mga nahisgutang ahensya ug buhatan, kay matod niya, sa gisang-at nga petisyon walay gideklarar nga sad-an o unsa man.
Nalakip sa maong petition mao ang pag hatag og pagtugot nga unta dawaton o hatagan og pagtugot ang authorization letter sa mga senior citizen nga nihatag og pagtugot sa ilang mga anak o bisan kinsang kabanay nga maoy mokuha sa ilang financial assistance.
Kahinomdoman nga niadtong Oktobre 25, hingpit na nga nasugdan ang pagpang apod-apod sa matag senior citizen og 1,000 matag buwan.
