Gilauman nga ang kalampusan sa national men ug women’s teams sa Southeast Asian Beach Handball Championships kay makapausbaw sa ilang kampanya sa 33rd SEA Games sa Thailand.
Malaumon nga makasakmit og labing labing unang SEA Games medal si men’s team member Rafael Andrew Agtarap ug strength and conditioning coach Gab De Guzman sa handball human makuha ang bulawan sa event nga gipahigayon sa Suphanburi, Thailand sa miaging semana.
Diin gipildi sa Pilipinas ang Vietnam sa men’s final, 2-1, nga gipasiugdahan sa kulbahinam nga 9-8 nga kadaugan pinaagi sa shootout, aron makuha ang labing una nilang beach handball gold sa SEA region.
Ang indoor handball ra ang duwaon sa SEA Games nga gikatakda karong Disyembre 9-20 ug ang Pilipinas moapil sa samang mga team nga nakigtigi sa beach handball meet.
Si Agtarap niingon nga ang kasinatian sa SEA beach handball maoy nagsilbi nga sukdanan kon unsay angay pauswagon sa duha ka teams tungod kay pareho silang mag-atbang sa SEA Games.
Gitataw ni De Guzman nga gikinahanglan ang training camps alang sa duha ka national teams, ilabi na sa men’s nga mosalmot sa Asian Beach Handball Championships sa Oman karong Mayo.
Samtang, nakalangkat usab og bronze medal ang women’s team.
