Nakabatyag ang Pilipinas og makaalarma nga taas nga lebel sa gidudahang retail digital fraud sa bag-ohay nga holiday shopping weekend gikan sa ulahing bahin sa Nobyembre hangtod sa sayong bahin sa Disyembre 2024.
Base sa pagtuki gikan sa TransUnion, usa ka credit program reporting company, ang Pilipinas adunay nakita nga kinatibuk-ang average digital fraud rate nga 13.6% atol sa kataas sa holiday shopping weekend, ubos sa 14.3% nga natala sa samang panahon niadtong 2023.
Apan matod pa sa TransUnion, makaalarma ang maong lebel tungod kay mas taas kini kon itandi sa global average nga 4.6%.
Gipasabot sa kompaniya nga posibleng mokusog ang pagpangatake sa mga mangingilad karon nga sagad sa mga Pinoy makadawat sa ilang suholan, mandatory 13th month pay ug Christmas bonus sulod sa maong panahon.
Gipahimangnuan niini ang mga konsumidor nga naghinamhinam nga mogasto sa ilang mga bonus nga kinahanglang sa maayong mga deal online aron makapalit og mga regalo.
Kana gumikan kay kini usa ka higayon alang sa mga mangingilad nga pahimuslan ang mga mamalitay.
Ang pinakaulahing pagtuki, naghatag ug dugang rason nga magmabinantayon ang mga konsumidor ug aron matubag sa gobyerno ang nahibiling mga buslot sa pakigbatok sa cyber fraud sa nasud.
Kahinumduman, nga nipirma na kaniadto si Presidente Ferdinand Marcos Jr isip usa ka balaod ang Anti-Financial Account Scamming act nga nagtumong sa pagsukol sa pinansyal nga cybercrimes, pagpanalipod sa interes sa pinansyal nga mga konsumidor ug pagpalig-on sa integridad sa financial system sa nasud.
Ubos niini, gidili ug gisilotan ang mga krimen sa panalapi sama sa money mules, pagpahigayon og social engineering schemes ug paghimo og economic sabotage.
