Gihimakak sa Philippine Navy nga anaa na sa ilang kustodiya ang retiradong Marine Sgt. Orly Regala Guteza, ang kanhi sundalo nga mitestigo sa imbestigasyon sa Senate Blue Ribbon Committee sa giingong ilegal nga proyekto sa gobyerno sa flood control.
Sumala sa tigpamaba sa Navy nga si Capt. Marissa Martinez, dugay nang retirado si Guteza sa Philippine Marine Corps sukad Hunyo 30, 2020, hinungdan nga wala na siyay koneksyon sa Philippine Navy.
Gihimo sa opisyal ang pamahayag human giingon ni kanhi Quezon City Rep. Mike Defensor nga si Guteza giingong ubos sa proteksyon sa Philippine Marines.
Kahinumduman nga si Guteza nahimong ulohan sa balita human niya gibutyag sa usa ka hearing sa Senado nga kuno nagdala siya og maleta nga kwarta sa balay sa kanhi House Speaker Ferdinand Martin Romualdez ug sa ulahi midumili nga hatagan og proteksyon sa Senado, nga nag-insister nga mapanalipdan niya ang iyang kaugalingon.
Apan, mitumaw ang mga pagduhaduha bahin sa iyang kredibilidad sa dihang usa ka abogado ang mihimakak sa pagpirma sa affidavit nga gibasa ni Guteza sa Senado, nga kuno naghimo nga imposible ang pagkontak sa kanhing sundalo.
Kabahin niini, si Capt. Martinez miingon nga ang Philippine Navy nagpabilin nga propesyonal ug walay gidapigan, nga iyang giingon nga komitado sa pagtuman sa mga katungdanan niini ug pagserbisyo sa nasud nga may dungog ug integridad. | via Bombo Ken Apor
