Wala na ang Pilipinas sa listahan sa “high-risk” money laundering sa European Union (EU).
Kini nunot sa pagkatangtang sa Pilipinas sa gray list sa money laundering watchdog nga Financial Action Task Force (FATF) niadtong Pebrero.
Gihangop sa European Chamber of Commerce of the Philippines ang pagtangtang sa nasud sa listahan sa mga nasud nga hugot nga gibantayan alang sa money laundering ug terrorism financing, nga matud pa resulta sa hugot nga pakigbatok sa gobyerno sa maong mga ilegal nga kalihokan.
Gitan-aw sa grupo ang dugang pagpausbaw sa pagsalig sa mga mamumuhunan ug pagpasayon ??sa pinansyal nga mga transaksyon sa mga European counterparts ug pagpakita sa reputasyon sa Pilipinas isip usa ka kasaligan ug madanihon nga destinasyon alang sa pamatigayon ug pamuhunan.
Gawas sa PH, ang Barbados, Gibraltar, Jamaica, Panama, Senegal ug Uganda gitangtang usab sa listahan samtang ang Algeria, Angola, Ivory Coast, Kenya, Laos, Lebanon, Namibia, Nepal, Venezuela, ug Monaco gidugang sa listahan sa mga nasud nga hugot nga gibantayan alang sa money laundering.
Subay niini, gikatakda nga ipaubos sa pagrepaso sa Parliamento sa Europa ug member states ang bag-ong listahan sa EU, sa dili pa kini ipatuman sulod sa usa ka bulan kung wala y mga pagsupak.
