Gipahibalo sa Bureau of Quarantine (BOQ) sa Department of Health nga walay bag-ong kaso sa Nipah virus nga na-detect sa Pilipinas hangtod karon.
Kahinumduman nga ang katapusang mga kaso sa Nipah virus natala sa Sultan Kudarat niadtong 2014.
Sumala ni Dr. Roberto Salvado, officer-in-charge sa BOQ, wala silay na-monitor o na-intercept nga bisan kinsa nga miabot sa nasud nga nataptan sa virus gikan sa direktang paglupad gikan sa India, diin adunay seasonal outbreak sa sakit.
Bisan pa, gipasalig sa BOQ sa publiko nga adunay mga safety health measures nga gihimo aron mapugngan ang pagsulod ug pagkaylap sa virus, lakip ang 24/7 monitoring sa mga airport ug seaport sa tanan nga pasahero.
Gawas niini, gigamit usab ang e-Travel system alang sa border control, health surveillance, ug economic analysis.
Pinaagi niini nga aplikasyon, dali nga mamonitor ang mga pasahero gikan sa direktang paglupad gikan sa India.
Adunay usab infrared thermal scanners nga gibutang sa mga airport ug pantalan, diin duha ka BOQ nurse ang gi-assign sa pag-monitor sa temperatura sa mga pasahero.
Samtang, aduna usab mga spotter nga mosusi sa mga pantal o uban pang timailhan sa sakit nga wala gideklarar sa e-Travel app.
Nagpasidaan usab ang opisyal sa publiko, ilabi na sa mga mobiyahe sa mga nasud nga adunay kasaysayan sa pag-ulbo sa Nipah virus, sa pagpangandam ug pag-obserbar sa health protocols.
