PROVINCE OF CEBU- Gipasiugda karon sa Philippine Red Cross (PRC) ang paghatag og psychosocial support alang sa mga pamilya nga grabe nga naapektuhan sa bag-ong mga kalamidad sa Northern Cebu, ilabina sa mga temporaryong nanimuyo sa mga tent city sa Bogo ug Medellin.
Matod ni Maria Vera de Jesus, PRC Cebu Chapter Administrator, nga ang pag-ayo sa kahimsog sa hunahuna ug pagbati susama kaimportante sa pisikal nga pagbangon human sa trahedya.
Gitumbok sa PRC ang pagpatuman sa psychosocial interventions aron matabangan ang mga biktima nga makab-ot ang emosyonal ug mental nga kahupayan human sa kasakit ug kakulang sa pinuy-anan.
Usa sa mga inisyatiba sa PRC mao ang unang movie marathon night nga gipahigayon sa Bogo Tent City, aron mapukaw ang kasadya ug kalipay sa mga biktima, ilabina sa mga kabataan.
Giplano usab nga magbutang og wading pools, sports area, ug play park aron makatabang sa psychological healing sa mga bata ug hamtong nga naapektuhan.
Sa kasamtangan, duha ka dagkong tent city ang gitukod sa PRC, usa sa Bogo City nga adunay 117 ka pamilya nga nagpuyo sa 136 ka tent, ug laing usa sa Medellin diin 50 ka pamilya ang kasamtangang nanimuyo.
Gilauman nga muabot pa sa 200 ka tent ang matukod aron matabangan ang mas daghang pamilya nga nawagtangan og balay.
Gipasabot ni De Jesus nga ang matag tent city kompleto sa mga pasilidad sama sa shower area, portalet, health station, child-friendly space, ug mobile food truck aron masiguro ang kaluwasan, kahupayan, ug dignidad sa mga evacuee.
