Wala’y angay kabalak-an ang Pilipinas sa bag-ong lagda sa Coast Guard nga gipatuman kuno sa China sa West Philippine Sea, ug bisan sa ubang mga teritoryo nga giinsister niini nga angkonon.
Kini ang gipahibalo ni Chinese Foreign Ministry spokesperson Mao Ning nunot sa pamahayag ni Presidente Ferdinand “Bongbong” Marcos Jr. nga makonsiderar nga “escalation” ug makapabalaka ang bag-ong mga lagda nga gipatuman sa China sa maong mga katubigan.
Matud pa sa maong opisyal sa China nga ang mga lagda sa Coast Guard nga ilang gipatuman gitumong aron ma-standardize ang pagpatuman sa balaod ug ma-promote ang ilang maritime order, hinungdan nga matud niya walay rason nga mahadlok ang bisan kinsang indibidwal niini basta wala lay ilegal nga mga kalihokan.
Kung mahinumdoman, epektibo sugod Hunyo 15, 2024 ipatuman ang ilang 2021 Coast Guard nga balaod ug bag-ong mga lagda sa coast guard nga nagtugot sa ilang mga personahe nga makadakop sa mga indibidwal nga giingong nakahimog trespassing sa ilang giangkon nga teritoryo.
