CENTRAL VISAYAS-Miisyu og Local Red Tide Warning ang buhatan sa Bureau of Fisheries and Aquatic Resources – Central Visayas (BFAR-7) human na nakuhaan og resulta sa presensya sa Paralytic Shellfish Poison nga nakolekta sa baybayon sa Gairan, Bogo City ug Canhabagat, Medellin sa lalawigan sa Sugbo ug sa Dauis ug Tagbiliran City sa lalawigan sa Bohol.
Ang BFAR-7 mitaho nga kini nga mga resulta nag gikan sa ilang mga Regional Fisheries Laboratory diin ang mga shellfish sa mga naasoy nga dapit kay nagpositibo sa makahilong mga kinsahon.
Ang PSP kay usa ka naturally-occurring nga marine biotoxin nga gihimo sa pipila ka mga species sa microscopic algae diin mahimo kini nga hinungdan sa grabeng pagsakit sa tiyan ug sa posibilidad sa kamatayon kung makaon.
Sa pakighinabi sa Bombo Newsteam kang Johann Tejada, ang tigpamaba sa BFAR-7 diin giasoy niya nga isip kabahin sa precautionary measure kay mipahibalo ilang buhatan ngadto sa publiko nga likayan usa ang papangolekta, pagbaligya, o pagkonsumo sa tanang klase sa kinsahon sa mga dapit sa Dauis ug Tagbilaran sa Bohol ug Bogo City ug Medellin sa Sugbo.
Samtang nagpabilin nga peligro ang mga kinhason, ang ubang mga produkto sa dagat sama sa isda, nukos, alimango, ug hipon gikonsiderar nga luwas nga kan-on, basta ang tanan nga mga ginhawaan kuhaon ug hugasan pag-ayo sa tubig sa dili pa lutoon.
Pabiling giawhag sa buhatan ang publiko nga magpabiling kahibalo ug sundon ang mga tambag sa kahimsog aron makalikay sa bisan og unsang kadaot gikan sa kontaminasyon sa red tide.
