Gikumpirmar sa Embahada sa Pilipinas sa Doha, Qatar nga pipila ka mga Filipino ang gidakop ug gitanggong sa Arab country tungod sa pagpahigayon og dili awtorisadong political demonstrations gahapong adlawa.
Sa usa ka pamahayag, ang Embahada miingon nga nakig-alayon na sila sa mga lokal nga awtoridad sa Qatar aron mahatagan og tukmang tabang ang maong mga Filipino.
Wala maghisgot ang Embahada kon may kalambigitan ba kini sa kaylap nga mga protesta nga gihimo dungan sa ika-80 nga adlawng natawhan ni kanhi Presidente Rodrigo Duterte.
Gisubli sa Embassy ang kanhing advisory niini alang sa tanang Filipino citizen sa Qatar nga mosunod sa mga lagda ug regulasyon sa nasud mahitungod sa pagpahigayon og mga miting ug mga aksyong protesta nga adunay tema sa politika.
