Suspendido ang duha ka pampublikong tunghaan sa bukirang barangay sa dakbayan sa Sugbo niadtong Miyerkules, Agosto 5, 2026, isip precautionary measure nunot sa online posts nga nagpatunghag kabalaka bahin sa kaluwasan sa eskwelahan.
Giklaro sa mga nagdumala sa tunghaan nga ang pagsuspinde gipatuman aron unahon ang kaluwasan ug kaayohan sa mga estudyante samtang ang mga awtoridad nagpadayon sa pag-verify sa kasayuran ug pagsusi sa kahimtang.
Gipasaligan usab nila ngadto sa mga ginikanan ug publiko nga hugot ang ilang pakig-alayon sa Philippine National Police (PNP) ug ubang hingtungdan nga ahensya.
Subay niini, gipakatap ang mga sakop sa kapulisan sa mga apektadong lugar sa eskuylahan aron palig-onon ang seguridad ug paghatag kasegurohan alang sa mga estudyante, ginikanan, magtutudlo, ug kawani sa eskuylahan.
Sa karon, ang mga awtoridad nagpadayon sa pag-monitor sa sitwasyon ug visible presence aron makatabang sa pagsiguro sa kaluwasan sa publiko.
Sa maong panghitabo, giawhag ni Arturo Bayocot, Regional Director sa Department of Education (DepEd) R7, ang mga ginikanan nga mohimo og mas proactive nga mga lakang sa parenting tungod kay ang gidaghanon sa mga hulga sa seguridad sa mga eskwelahan nga naglambigit sa mga bata nagpadayon sa pagsaka sa rehiyon.
Hugot nga nagtuo si Dir. Bayocot nga ang pagmonitor sa ilang mga anak importante dili lamang kung adunay mga problema nga motumaw.
Sa laing bahin, ang ubang mga tunghaan sa tibuok dakbayan sa Sugbo padayong nagpahigayon og regular nga klase samtang nagpatuman sa gipataas nga mga lakang sa seguridad ug nagmintinar sa hugot nga koordinasyon sa mga awtoridad sa pagpatuman sa balaod.
