Gikompirmar sa Philippine National Police (PNP) nga adunay ‘friendly fire’ atol sa anti-kidnapping police operation sa Angeles City, Pampanga nga misangpot sa kamatayon sa usa ka pulis ug nakaangol sa laing usa.
Matod ni PNP Public Information Office Chief, PCol. Jean Fajardo, nga basi sa inisyal nga imbestigasyon, samtang nagpahigayon og clearing ops sa usa ka apartment nga gidala sa duha ka Chinese national, sa ngitngit nga bahin sa balay, usa ka patrol nga sakop sa entering team ang aksidenteng nakabitbit sa gatilyo sa iyang armas.
Hinungdan naigo niini ang duha nila ka mga kaubang pulis.
Giingong unang naigo sa bala si PCMSgt. Eden Accad nga mao’y nangulo sa operasyon, apan gamit ang 5.56 armalite, ang bala milapos sa buko-buko ni Accad hangtod nga naigo si PSSgt. Nelson Santiago.
Walay bullet vests ang duha busa fatal ang mga nahiaguman niini.
Nasuta sa autopsy report nga namatay si Santiago tungod sa pagkaigo sa bala sa walang bahin sa iyang dughan nga nakaapekto sa right lobe sa iyang baga ug dagkong ugat sa kasingkasing samtang si Accad kasamtangan pa nga naka-confine sa tambalanan.
Gitataw ni Fajardo nga walay cover-up sa imbestigasyon tungod kay niadtong adlaw nga nahitabo ang insidente, ang mga polis nga mipusil sa iyang kaugalingon daling midala kang Accad ug Santiago sa tambalanan.
Bisan og aksidente lang, gipasakaan siya og kasong reckless imprudence resulting in homicide in serious physical injury ug kasamtangang gitanggong sa anti-kidnapping group.
Sa laing bahin, gikatahong gimando ni PNP Chief Police General Rommel Francisco Marbil nga gawas sa mga polis nga mipusil, imbestigahon usab ang mga team leaders ingon man ang matang sa armas ug bala nga gigamit.
