Gipaningkamutan sa Philippine National Police (PNP) nga masiguro ang proteksyon sa mga konsumidor ug sa publiko, human sa mga taho sa pagsaka sa presyo sa karne ug mga utanon, hilabi na samtang nagkaduol ang panahon sa Pasko.
Matud ni acting PNP Chief, Police Lieutenant General Jose Melencio Nartatez Jr., ang PNP nagpadala og dugang mga pulis sa nagkalain-laing merkado, lakip na sa mga supermarket, ug bisan ang mga wet market.
Kini nga lakang nagtumong sa pagpugong sa mga ilegal nga kalihokan sama sa hoarding, profiteering, panic-buying, ug uban pang posibleng mga kagubot nga makaapekto sa suplay ug presyo sa mga palaliton.
Kini nga aksyon sa PNP subay sa direktiba ni Presidente Ferdinand “Bongbong” R. Marcos, Jr. nga nagmando sa PNP ug DILG Secretary Jonvic Remulla nga mag-focus ug mosiguro sa kaayohan sa mga konsumidor pinaagi sa pagsiguro sa padayon ug walay hunong nga pag-access sa publiko sa mga batakang panginahanglan ug mga palaliton.
Gipasiugda pa ni Nartatez nga ang PNP hugot nga nakig-alayon ug nakigtambayayong sa Department of Trade and Industry (DTI) ug sa nagkalain-laing local government units (LGUs) aron hugot nga bantayan ang paglihok sa mga presyo sa palaliton sa merkado.
