Ipatuman sa Philippine National Police (PNP) ang “full alert status” sa tibuok nasud gikan sa Oktubre 30 hangtod sa Nobyembre 2, isip pagpangandam alang sa pagsaulog sa All Saints’ Day ug All Souls’ Day nga gitawag og Undas.
Matod ni PCol. Allen Rae Co, hepe sa PNP Public Information Office, kini nga lakang nagtumong sa pagsiguro sa malinawon nga pagbiyahe alang sa mga mopauli sa ilang mga probinsya, ingon man alang sa publiko nga mobisita sa mga sementeryo.
Magdeploy ang kapulisan og 72,501 ka mga opisyal, nga dugangan pa sa dul-an 17,000 ka mga personahe gikan sa Armed Forces of the Philippines, Philippine Coast Guard, ug uban pang mga ahensya.
Dugang pa, nakig-alayon pag-ayo ang kapulisan sa nagkalain-laing lokal nga yunit sa gobyerno aron masiguro ang epektibong pagpatuman sa mga lakang sa seguridad.
